کشمیریوں سے اظہار یکجہتی، ملک بھر میں مظاہرے، مقبوضہ وادی میں 2700 اجتماعی قبروں کا انکشاف ایکسپریس اردو

کراچی / نئی دہلی / سرینگر:  وزیر اعظم عمران خان کی کال پر ملک بھرمیں کشمیریوں سے اظہاریکجہتی کیلئے ریلیاں نکالی گئیں اورمظاہرے کیے گئے ،ادھر مقبوضہ کشمیر میں کھدائی کے دوران2ہزار 700اجتماعی قبروں کا انکشاف ہواہے۔

پاکستان کوسٹ گارڈزنے یکجہتی کشمیر ریلی نکالی اور کشمیریوں کو انصاف دو اور بھارت کی جانب سے ظلم وستم کو ختم کر نے کے نعرے لگاتے ہوئے واضح پیغام دیا کہ کشمیر ہماری شہ رگ ہے، کشمیر بنے گا پاکستان، ہم لے کے رہیں گے۔

ڈی جی بریگیڈیئر سجاد سکندر رانجھاستارہ امتیازملٹری نے کہا کہ ہم اس مشکل کی گھڑی میں کشمیری عوام کے ساتھ ہیں اور ہم ان سے الگ نہیں،موجودہ حکومت اس وقت عالمی سطح پر کشمیر کے مسئلے کو جس طرح اجاگر کر رہی ہے اس کی کوئی مثال نہیں ملتی۔ہیومن رائٹس پروٹیکشن فورم کے طرف سے مقبوضہ کشمیر میں بھارتی مظالم ظلم وبربریت کیخلاف احتجاجی ریلی نکالی۔

دریں اثناء سکھرمیں ہیومن رائٹس پروٹیکشن فورم کے طرف سے مقبوضہ کشمیر میں بھارتی مظالم ظلم وبربریت کیخلاف احتجاجی ریلی نکالی گئی، صدر الہی بخش میتلوودیگرنے کہا کشمیر میںبھارتی تسلط ، ظلم و بربریت اور کرفیو انسانی حقوق کی سنگین خلاف ورزی ہے، عالمی برادری ا س کا نوٹس لے۔دریں اثنا امریکا کے شہر لاس اینجلس میں امریکی مسلمان شہریوں کی جانب سے مقبوضہ کشمیر میں انسانی حقوق کی خلاف ورزیوں پر ریلی اور مظاہرے بھی کیے گئے۔

علاوہ ازیں بھارت میں جواہر لال نہرو یونیورسٹی کے طلبا نے دفعہ 370کی منسوخی کے خلاف احتجاج کیاجس میں بھارتی وزیر جتندرا سنگھ بھی شریک تھے، بائیں بازو کی تنظیموں کے طلبا کے گروپوںاور ہندو انتہا پسند تنظیم آر ایس ایس سے وابستہ اکھیل بھارتیہ ودیارتھیہ پریشدکے درمیان شدید تلخ کلامی بھی ہوئی طلبا نے یونیورسٹی کنونشن سینٹر کے باہر احتجاجی مظاہرہ کیا اور ’’کشمیر ہے کشمیریوں کا ،ہندوستان کی جاگیرنہیں‘‘جیسے نعرے بلند کیے ۔جموں وکشمیر لبریشن فرنٹ کی کال پر بھمبر سے سرینگر تک براستہ مظفرآباد چکوٹھی آزادی مارچ کا آغازکردیاگیا۔

لبریشن فرنٹ کے ترجمان رفیق ڈار کے مطابق میرپورسے جلوس کوٹلی، راولاکوٹ، باغ اور دھیرکوٹ سے ہوتا رات گئے مظفرآباد پہنچے گااورپھر مظفرآباد سے چکوٹھی کیطرف روانہ ہوگا۔ ہٹیاں بالا سے نمائندہ اعجاز احمد میرکے مطابق جموں و کشمیر لبریشن فرنٹ کے قافلے لائن آف کنٹرول چکوٹھی توڑنے کی کال قافلے آزاد کشمیر بھر سے چل پڑے ،دی اکنامسٹ‘‘نے رپورٹ میں لکھا ہے کہ بی جے پی کی حکومت نے وادی کو ایک بڑی جیل میں تبدیل کردیا ہے۔

پی پی آئی کے مطابق مقبو ضہ کشمیر کی بندش سے ریلوے کو دوکروڑسے زائد کا نقصان ہوا،دوسری جا نب کرفیو اور پابندیوں کے باعث مقبوضہ وادی میں نظام زندگی مفلوج ہے۔شکرگڑھ سے معروف عالم دین ممنون آسوی نے کہاکہ دنیا پر بھارت کا مکروہ چہرہ آشکار ہو چکا ہے ۔ عالمی طاقتیں بھارتی غنڈہ گردی کانوٹس لیں۔علاوہ ازیں فوٹیج میں یاسین ملک کو سخت پہرے میں عدالت پیش کیا جا رہا ہے۔

انٹر نیشنل ہیومن رائٹس کورٹ اور کشمیر میں عدالتِ انصاف(آئی پی ٹی کے) نامی این جی او کی جانب سے شائع کردہ رپورٹ میں مقبوضہ کشمیر میں شمال میں 55دیہات میں کھدائی کے دوران2ہزار 700اجتماعی قبروں کا انکشاف ہواہے ، قابض فوج کے انسانیت سوز مظالم میں بتدریج اضافہ ہو رہا ہے۔

دریں اثنا اقوام متحدہ کے سیکریٹری جنرل انتونیو گوتریس نے مقبوضہ کشمیر کی صورتحال پر شدید تشویش کا اظہار کیا ہے اور کہا ہے کہ مسئلہ کشمیر کے حل کے لیے پاکستان اور بھارت مذاکرات کریں۔

ترجمان اقوام متحدہ کے مطابق انھوں نے کہا کہ مقبوضہ کشمیر میں کرفیو کو 60روز گزر گئے ہیں۔ مقبوضہ وادی میں اسی لاکھ لوگ قید ہیں۔ مقبوضہ کشمیر پر اقوام متحدہ کا موقف تبدیل نہیں ہوا۔

The post کشمیریوں سے اظہار یکجہتی، ملک بھر میں مظاہرے، مقبوضہ وادی میں 2700 اجتماعی قبروں کا انکشاف appeared first on ایکسپریس اردو.

from ایکسپریس اردو https://ift.tt/2nkw5Zd
via IFTTT