کراچی میں آج چیمپئنز کوئٹہ اور پشاور کا ٹکراؤ ایکسپریس اردو

کراچی /  لاہور:  پی ایس ایل5میں ہفتے کو کراچی میں چیمپئنز کا ٹکراؤ ہوگا، نیشنل اسٹیڈیم میں کوئٹہ گلیڈی ایٹرز اور پشاور زلمی کی ٹیمیں مقابل ہوں گی۔

پی ایس ایل5میں ہفتے کی دوپہر نیشنل اسٹیڈیم کراچی میں کوئٹہ گلیڈی ایٹرز کو پشاور زلمی کا سامنا کرنا ہے، دفاعی چیمپئن نے افتتاحی میچ میں 2بار ٹائٹل جیتنے والے اسلام آباد یونائیٹڈ کو زیر کرتے ہوئے سفر کا کامیاب آغاز کیا تھا، سرفراز احمد کی زیرقیادت کھیلنے والی ٹیم میں شین واٹسن، جیسن رائے،احمد شہزاد، احسن علی اور ان فارم بین کٹنگ جیسے اسٹار بیٹسمین شامل ہیں۔

دوسری طرف ایک بار پی ایس ایل چیمپئن بننے والی ٹیم پشاور زلمی کو گذشتہ روز کراچی کنگز سے شکست کا سامنا کرنا پڑا تھا، وہ اس کا ازالہ کرنے کی کوشش کرے گی،قیادت ڈیرن سیمی کر رہے ہیں،کامران اکمل، ٹام بینٹن اور شعیب ملک بیٹنگ کی جان ہیں۔

کراچی کیخلاف ففٹی بنانے والے لیونگ اسٹون اور لیام ڈاسن بھی میچ کا پانسہ پلٹ سکتے ہیں،ٹیم کو حسن علی اور وہاب ریاض جیسے پیسرز بھی دستیاب ہیں،البتہ پہلے میچ میں دونوں کی بولنگ اچھی نہیں رہی تھی۔

لاہور کے قذافی اسٹیڈیم میں شام کو اسلام آباد یونائٹیڈ اور ملتان سلطانز کا سامنا ہوگا، شاداب خان کی زیرقیادت کھیلنے والی ٹیم اسلام آباد بھی پہلا میچ ہارنے کے بعد اب فتح کیلیے کوشاں ہے، اس کے پاس لیوک رونکی، ڈیوڈ میلان، کولن منرو اور آصف علی جیسے جارح مزاج بیٹسمین موجود ہیں،بولنگ میں محمد موسیٰ اور فہیم اشرف سے امیدیں وابستہ ہیں، عاکف جاوید بھی ساتھ دینے کیلیے موجود ہونگے۔

دوسری جانب شان مسعود کو رلی روسو، جیمز ونس، وائن میڈسن اور خوشدل شاہ کی خدمات میسر ہیں،آل راؤنڈرز میں شاہد آفریدی جیسا بڑا نام بھی موجود ہے، معین علی اور روی بوپارا بھی موجود ہوں گے،عمران طاہر لیگ اسپن کے جادوگر ہیں، جنید خان اور محمد عرفان سے بھی بہتر کارکردگی کی امیدیں وابستہ ہوں گی۔

The post کراچی میں آج چیمپئنز کوئٹہ اور پشاور کا ٹکراؤ appeared first on ایکسپریس اردو.

from ایکسپریس اردو https://ift.tt/3c0trMr
via IFTTT