شاہ رخ جتوئی کی جیل واپسی؛ مختلف ہسپتالوں سے 15 قید دوبارہ جیل منتقل ایکسپریس اردو

 کراچی: سپریم کورٹ کی جانب سے شاہ زیب قتل  کے مرکزی مجرم شاہ رخ جتوئی کی جیل واپسی کے بعد مختلف ہسپتالوں سے قیدیوں کی منتقلی کا سلسلہ شروع ہوگیا۔

ہسپتال سے واپس سینٹرل جیل منتقل کیے جانے والوں میں مختلف سیاسی جماعتوں کے کارکنان، قومی و غیر ملکی اداروں میں اعلی عہدوں پر فائز افسران اور دیگر شامل ہیں۔

گزشتہ روز سینٹرل جیل کے قیدی شاہ رخ جتوئی کی نجی ہسپتال سے سینٹرل جیل واپس منتقلی کے بعد یہ سلسلہ چل پڑا اور رات تک مختلف سرکاری و نجی ہسپتالوں سے 15 سے زائد قیدی سینٹرل جیل پہنچ گئے۔

مزیدپڑھیں: شاہ زیب قتل کیس؛ شاہ رخ جتوئی کی جیل کے بجائے اسپتال میں شاہانہ زندگی کا انکشاف

یہ قیدی مختلف الزامات کے تحت جیل میں قید تھے۔ جیل حکام کا کہنا ہے کہ 5 ہزار قیدیوں میں 20 سے 25 افراد عموما ہسپتالوں میں داخل ہوتے ہیں۔

گزشتہ روز واپس جیل منتقل کیے جانے والوں میں عمیر صدیقی، ذیشان، صدیق، سلمان ابڑو، کشور کمار، سعید بھرم، محمد نعیم اور دیگر شامل ہیں۔

اس سلسلے میں جیل حکام کا کہنا ہے کہ عمومی طور پر سینٹرل جیل کراچی میں 5 ہزار سے زائد قیدی موجود ہوتے ہیں اور ان میں تقریباً 25 قیدی مختلف سرکاری و نجی ہسپتالوں میں زیر علاج تھے۔

خیال رہے کہ شاہ زیب خان قتل کے مرکزی مجرم شاہ رخ جتوئی کے متعلق اہم انکشاف ہوا تھا کہ وہ کئی ماہ سے جیل کے بجائے کراچی کے علاقے گزری میں واقع غیر معروف نجی ہسپتال کی بالائی منزل پر شاہانہ زندگی گزار رہے تھے۔

یہ بھی پڑھیں: شاہ زیب قتل کیس؛ شاہ رخ جتوئی سمیت تمام ملزمان رہا

شاہ رخ جتوئی کو پرائیویٹ اسپتال میں محکمہ داخلہ سندھ کے حکم پر چند ماہ قبل منتقل کیا گیا۔ قمرالاسلام اسپتال شاہ رخ جتوئی کے خاندان نے کرائے پر حاصل کر رکھا ہے۔ خبر سامنے آنے کے بعد شاہ رخ جتوئی کو نجی اسپتال سے دوبارہ سینٹرل جیل منتقل کردیا گیا۔

واضح رہے کہ شاہ رخ جتوئی نے شاہ زیب خان کو دسمبر 2012 میں فائرنگ کر کے قتل کردیا تھا۔

The post شاہ رخ جتوئی کی جیل واپسی؛ مختلف ہسپتالوں سے 15 قید دوبارہ جیل منتقل appeared first on ایکسپریس اردو.

from ایکسپریس اردو https://ift.tt/3nyGfBt
via IFTTT