پریانکا بھی شادی کے معاملے پر دپیکا کے نقش قدم پر چل پڑیں ایکسپریس اردو

ممبئی: بالی ووڈ اداکارہ اور سابق ملکہ حسن پریانکا چوپڑا نے دپیکاپڈوکون اور رنویر سنگھ کے نقش قدم پر چلتے ہوئے اپنی شادی میں موبائل فون کے استعمال پر پابندی لگادی۔

حال ہی میں شادی کے بندھن میں بندھنے والی اسٹار جوڑی دپیکا پڈوکون اور رنویر سنگھ نے اپنی شادی پر موبائل فون کے استعمال پر پابندی عائد کی تھی تاکہ شادی کی تصاویر سوشل میڈیا پر لیک نہ ہوجائیں۔ اداکارہ پریانکا چوپڑا نے بھی تصاویر لیک ہونے کے ڈر سے یہی طریقہ اپنایا ہے۔

اس خبرکوبھی پڑھیں: پریانکا اور نک جونز کی تصاویر لاکھوں ڈالرز میں فروخت کی جائیں گی

بھارتی میڈیا کے مطابق پریانکا چوپڑا اورنک جونز کی شادی میں بھی مہمانوں کے موبائل فون استعمال کرنے پر پابندی عائد ہوگی۔ دونوں اسٹارز نے اپنی شادی کی تصاویر کے حقوق ایک بین الاقوامی میگزین کو 2.5 ملین ڈالرز(تقریباً 33 کروڑ روپے) میں فروخت کیے ہیں۔ لہٰذا شادی کی تقریب میں اس بات کا سختی سے خیال رکھاجائے گا کہ کوئی بھی مہمان اپنے موبائل سے تصاویر نہ کھینچ سکے۔

اس خبرکوبھی پڑھیں: پریانکا نے شادی میں پیسہ پانی کی طرح بہانے کی ٹھان لی

واضح رہے کہ پریانکا چوپڑا اورنک جونز کی شادی کی تقریبات کاآغاز آج سے ہوگیا ہے جو 3 دسمبر تک جاری رہیں گی۔ پریانکا اورنک جونز 2 دسمبر کو ہندو اور3 دسمبر کو کرسچن روایات کے مطابق شادی کے بندھن میں بندھیں گے۔

The post پریانکا بھی شادی کے معاملے پر دپیکا کے نقش قدم پر چل پڑیں appeared first on ایکسپریس اردو.

from ایکسپریس اردو https://ift.tt/2zxMa0B
via IFTTT

سندھ ہائیکورٹ؛ لاپتا شہری کی اہلیہ نے دھمکیوں پر درخواست واپس لے لی ایکسپریس اردو

 کراچی: لاپتا شہری کی اہلیہ نے دھمکیوں اور دباؤ پر شوہر کی بازیابی کی درخواست واپس لے لی۔

سندھ ہائیکورٹ میں شہری محمود اعظم قاسمی کی گمشدگی سے متعلق درخواست کی سماعت ہوئی۔ محمود اعظم قاسمی کی اہلیہ نے عدالت سے کہا کہ وہ درخواست واپس لینا چاہتی ہیں، پرائیویٹ نمبر سے نامعلوم افراد  درخواست واپس لینے کے لیے دباؤ ڈال رہے ہیں۔

خاتون نے کہا کہ فون پر کہا گیا کہ درخواست واپس لے لو ورنہ شوہر کو نہیں چھوڑیں گے، خدا کے لیے میرا کیس مزید نا چلائیں، آپ نے کیس چلایا تو میرا شوہر واپس نہیں آئے گا، شوہر نو ماہ سے لاپتا ہے، اس کی جان کو خطرہ ہے۔

جسٹس نعمت اللہ پھلپھوٹو نے پوچھا کہ جس نمبر سے کال آئی آپ نے وہ نوٹ کیا؟۔ خاتون نے کہا کہ موبائل فون پر پرائیویٹ نمبر نظر ہی نہیں آتا، درخواست واپس لیتی ہوں اگر شوہر کو نا چھوڑا گیا تو میں عدالت کے سامنے احتجاج کروں گی۔ ہائی کورٹ نے قرار دیا کہ درخواست کو عارضی طور پر نمٹا دیتے ہیں اگر ضرورت پڑی تو دوبارہ سماعت کے لیے مقرر کردیں گے۔

The post سندھ ہائیکورٹ؛ لاپتا شہری کی اہلیہ نے دھمکیوں پر درخواست واپس لے لی appeared first on ایکسپریس اردو.

from ایکسپریس اردو https://ift.tt/2FP8c4g
via IFTTT

اعظم سواتی کو آرٹیکل 62 ون ایف کے تحت نوٹس کر دیتے ہیں، چیف جسٹس ایکسپریس اردو

 اسلام آباد: چیف جسٹس پاکستان میاں ثاقب نثار نے کہا ہے کہ اعظم سواتی کو آرٹیکل 62 ون ایف کے تحت نوٹس کر دیتے ہیں۔

سپریم کورٹ میں وفاقی وزیر سائنس اینڈ ٹیکنالوجی اعظم سواتی کے خلاف از خود نوٹس کی سماعت ہوئی۔ اعظم سواتی کے وکیل علی ظفر نے عدالت میں پیش ہوکر کہا کہ میں نے ابھی تک جے آئی ٹی رپورٹس نہیں دیکھیں۔ چیف جسٹس نے کہا کہ کیس میں بنیادی سوال تو دھونس دھاندلی کا تھا، جے آئی ٹی کو پوچھنا تھا کہ پرچہ درج ہو سکتا ہے یا نہیں۔

اس خبر کو بھی پڑھیں : وفاقی وزیراعظم سواتی کا فون اٹینڈ نہ کرنے پر آئی جی اسلام آباد کو ہٹا دیا گیا

عدالت میں اعظم سواتی سے متعلق جے آئی ٹی رپورٹ پیش کی گئی۔ رپورٹ میں اعظم سواتی کا موقف مسترد کرتے ہوئے کہا گیا کہ اعظم سواتی نے غلط بیانی کی، ان کے لئے خصوصی رویہ اپنایا گیا ہے اور انہوں نے اپنے اختیارات کا غلط استعمال کیا۔

چیف جسٹس نے کہا کہ آرٹیکل 62 ون ایف کے تحت نوٹس کر دیتے ہیں، ہم اعظم سواتی کے خلاف چارج فریم کرتے ہیں، وہ اپنا جواب جمع کرادیں۔ چیف جسٹس نے پوچھا کہ کتنے ایکڑ پر اعظم سواتی نے قبضہ کر رکھا ہے؟۔ وکیل علی ظفر نے اعظم سواتی بیرون ملک ہیں اور وہ تین دسمبر کو واپس آئیں گے۔ جسٹس اعجازالاحسن نے کہا کہ علی ظفر یہ ایک سنجیدہ مسئلہ ہے۔

یہ بھی پڑھیں: اعظم سواتی پر جے آئی ٹی رپورٹ سپریم کورٹ کے پاس جمع

چیف جسٹس نے جے آئی ٹی رپورٹ کی کاپی اعظم سواتی کے وکیل کو فراہم کرنے کا حکم دیتے ہوئے کہا کہ آپ اعظم سواتی کو بلا لیں یا پھر میں بلا لیتا ہوں، رپورٹ پڑھ کر آجائیں۔ اس موقع پر چیف جسٹس نے اعظم سواتی کے اہل خانہ کے ہاتھوں مبینہ تشدد کا شکار متاثرہ خاندان سے کہا کہ آپ کی غیرت کے لئے ہم لڑ رہے ہیں، آپ کو کیا حق ہے آپ ملزمان کو معافی دے دیں، کوئی معافی نہیں ہو گی، کیا ایسے شخص کو وزیر رہنا چاہیے۔ عدالت نے جے آئی ٹی رپورٹ پر اعظم سواتی سے جواب طلب کرتے ہوئے کیس کی سماعت منگل تک ملتوی کر دی۔

واضح رہے کہ اعظم سواتی کے گھر میں گائے گھسنے پر ان کے بیٹے اور گارڈز نے مبینہ طور پر کچی آبادی کے ایک گھر پر دھاوا بولا تھا۔ پھر اس خاندان کے خلاف مقدمہ بھی درج کرادیا گیا جب کہ اعظم سواتی کا فون نہ اٹھانے پر آئی جی اسلام آباد کو بھی عہدے سے ہٹادیا گیا تھا۔ چیف جسٹس نے معاملے کا از خود نوٹس لیا تھا اور سپریم کورٹ نے تحقیقات کیلیے جے آئی ٹی بنائی تھی۔

The post اعظم سواتی کو آرٹیکل 62 ون ایف کے تحت نوٹس کر دیتے ہیں، چیف جسٹس appeared first on ایکسپریس اردو.

from ایکسپریس اردو https://ift.tt/2KFXT1b
via IFTTT

وفاقی کابینہ کے اجلاس میں وزراتوں کی کارکردگی کا جائزہ ایکسپریس اردو

 اسلام آباد: وزیراعظم عمران خان کی زیر صدارت وفاقی کابینہ کا اجلاس جاری ہے۔

ایکسپریس نیوز کے مطابق وفاقی کابینہ کے اجلاس میں 100 روزہ پلان پر غور کیا جائے گا اور اس دوران تمام وزرا کی کارکردگی کا جائزہ لیا جائے گا، اجلاس میں 8 نکاتی ایجنڈا زیر غور ہے۔

ذرائع کے مطابق اجلاس میں پاک افغان سرحد پر باڑ اور لائٹنگ کے توسیعی مرحلے اور وزارت تجارت کی نئے نیشنل ٹیرف پالیسی کی منظوری دی جائے گی جب کہ اصلاحاتی پیکج میں گلگت بلتستان کو عبوری صوبے کا درجہ دینے کی سمری بھی ایجنڈے میں شامل ہے۔

The post وفاقی کابینہ کے اجلاس میں وزراتوں کی کارکردگی کا جائزہ appeared first on ایکسپریس اردو.

from ایکسپریس اردو https://ift.tt/2TTRdRs
via IFTTT

ہم وفاقی حکومت سے بالکل خوش نہیں، سپریم کورٹ ایکسپریس اردو

 اسلام آباد: سپریم کورٹ کے جج جسٹس عظمت سعید نے کہا ہے کہ ہم وفاقی حکومت سے بالکل خوش نہیں۔

صنعتی کارکنوں کو ورکرز ویلفیئر فنڈ سے ادائیگیوں کے معاملہ کی سماعت ہوئی۔ سیکرٹری خزانہ اور سیکرٹری سمندر پار پاکستانی عدالت میں پیش ہوئے۔ سپریم کورٹ نے وفاقی حکومت کو 17 جنوری تک ادائیگیاں کرنے کا حکم دیتے ہوئے کہا کہ ورکرز ویلفیئر فنڈ کے تحت چلنے والے اداروں کے ملازمین کو تنخواہوں کی ادائیگی کی جائے۔

جسٹس عظمت سعید نے کہا کہ کسی قسم کی تاخیر برداشت نہیں کی جائے گی، 124 ارب روپے کا تعین ہو چکا ہے، غبن ہوا تو معاملہ نیب کو بھجوائیں گے، 2013 سے کسی کو فوتگی پررقم نہیں ملی۔

جسٹس عظمت سعید نے ریمارکس دیے کہ ہم وفاقی حکومت سے بالکل خوش نہیں، مگر حکومتی پالیسی میں مداخلت نہیں کریں گے، بیوروکریسی ہمارے کندھوں پر بندوقیں رکھ کر نہ چلائے۔ ڈپٹی اٹارنی جنرل ساجد الیاس بھٹی نے عدالت میں رپورٹ جمع کروائی جس پر عدالت نے برہمی کا اظہار کیا۔

جسٹس عظمت سعید شیخ نے کہا کہ حکومت کے لوگ عدالت سے آدھا سچ بول رہے ہیں، حکومتی عہدے دار ایک شمال کی بات کرتا ہے ایک جنوب کی طرف جارہا ہے، وفاقی حکومت کیوں پیسہ ورکرز ویلفیئرفنڈ میں منتقل نہیں کر رہی، آپ صرف یہ بتادیں کتنے سالوں سے ڈیتھ گرانٹ ریلیز نہیں ہوئی، کیا لوگ اپنی لاشیں لا کر سیکرٹریٹ میں رکھ دیں؟ حکومت بتائے یہ پیسہ کس کا ہے؟۔

ڈپٹی اٹارنی جنرل ساجد الیاس بھٹی نے جواب دیا کہ یہ پیسہ ورکرز ویلفیر فنڈ کا ہی ہے۔ جسٹس عظمت سعید نے کہا کہ آپ کو امانت دی جائے توآپ لوگ گدھ بن کر بیٹھ جاتے ہیں، سیکرٹری اوورسیز اتنی ٹال مٹول مناسب نہیں ہے، عدالت اپنا کام کرے گی باقی ادارے بھی اپنا کام کریں، حکومت اگر کام نہیں کرے گی تو کسی تیسرے فریق سے کام کروا لیں گے۔

The post ہم وفاقی حکومت سے بالکل خوش نہیں، سپریم کورٹ appeared first on ایکسپریس اردو.

from ایکسپریس اردو https://ift.tt/2P7OGj2
via IFTTT

462 ارب روپے کرپشن کیس میں ڈاکٹر عاصم کے شریک ملزم عبدالحمید گرفتار ایکسپریس اردو

کراچی: سندھ ہائیکورٹ نے 462 ارب روپے کے کرپشن کیس میں ڈاکٹر عاصم کے شریک ملزم عبدالحمید کی درخواست ضمانت مسترد کردی جس کے بعد انہیں گرفتار کرلیا گیا۔

سندھ ہائیکورٹ میں پی ایس او کے ٹھیکوں میں  بدعنوانی اور 462 ارب روپے کے کرپشن کیس کی سماعت ہوئی۔ دوران سماعت عدالت نے ضمانتوں پر محفوظ فیصلہ سنا تے ہوئے سابق وزیر پٹرولیم اور پی پی پی کے رہنما ڈاکٹر عاصم کے شریک ملزم سابق سیکرٹری پیٹرولیم اعجاز چوہدری، محمد صفدر اور اطہر حسین کی درخواست ضمانت منظور کرلی، جب کہ ملزم عبدالحمید کی درخواست ضمانت مسترد کردی۔

ضمانت مسترد ہونے پر نیب نے ملزم عبدالحمید کو گرفتار کرلیا۔ عدالت نے شریک ملزم اطہر حسین کی ضمانت منظور کرتے ہوئے ملزم اطہر حسین کو 10 لاکھ روپے کے مچلکے جمع کرانے کاحکم دے دیا۔

اس خبرکوبھی پڑھیں: 462 ارب کی کرپشن؛ ڈاکٹرعاصم کے خلاف مقدمے کی سماعت بغیر کارروائی ملتوی

واضح رہے کہ ڈاکٹر عاصم حسین اور دیگر شریک ملزمان کے خلاف 462 ارب روپے کرپشن کا ریفرنس احتساب عدالت میں زیر سماعت ہے۔

The post 462 ارب روپے کرپشن کیس میں ڈاکٹر عاصم کے شریک ملزم عبدالحمید گرفتار appeared first on ایکسپریس اردو.

from ایکسپریس اردو https://ift.tt/2rcKzs8
via IFTTT

امریکی سینیٹ کی یمن جنگ میں سعودی عرب کی امداد ختم کرنے کی حمایت ایکسپریس اردو

 واشنگٹن: امریکی سینیٹرز نے یمن جنگ میں سعودی اتحاد کی حمایت ختم کرنے کیلئے ایوان میں قرارداد لانے کی حمایت کردی۔

یمن جنگ میں سعودی عرب کی امداد روکنے کے حوالے سے قرارداد پیش کرنے اور اس پر بحث کیلئے امریکی سینیٹ میں ووٹنگ ہوئی۔ 63 سینیٹرز نے بحث کے حق میں جبکہ 37 نے مخالفت میں ووٹ کاسٹ کیا۔

اب اس حوالے سے سینیٹ میں ایک حتمی قرارداد پیش کیے جانے کا امکان ہے۔ دوسری جانب صدر ڈونلڈ ٹرمپ نے دھمکی دی ہے اگر کانگریس نے یمن جنگ کی حمایت ختم کرنے کی حتمی قرارداد منظور کی تو وہ اسے ویٹو کردیں گے۔

یہ بھی پڑھیں: ولی عہد محمد بن سلمان خاشقجی قتل کے منصوبہ ساز نہیں، ٹرمپ

امریکی وزیر خارجہ مائیک پومپیو نے مخالفت کرتے ہوئے کہا کہ قرارداد لانے کیلئے یہ مناسب وقت نہیں، کیونکہ اس سے خطے میں ہماری امن کی کوششیں متاثر ہوں گی، جبکہ حوثی باغیوں اور ایرانیوں کی حوصلہ افزائی ہوگی۔

ترکی میں سعودی قونصل خانے میں صحافی جمال خاشقجی کے قتل کے بعد سے امریکا سمیت دنیا بھر میں سعودی حکومت اور ولی عہد محمد بن سلمان کی مخالفت میں شدید اضافہ ہوا ہے اور امریکا پر سعودی عرب کی غیر مشروط حمایت سے دستبردار ہونے کے لیے کافی دباؤ ہے۔

دوسری طرف ٹرمپ انتظامیہ نے دو ٹوک الفاظ میں موجودہ سعودی حکومت کی حمایت سے دست بردار ہونے سے انکار کرتے ہوئے کہا ہے کہ سعودی صحافی جمال خاشقجی کے قتل کا ذمہ دار ولی عہد محمد بن سلمان کو قرار نہیں دیا جاسکتا۔

The post امریکی سینیٹ کی یمن جنگ میں سعودی عرب کی امداد ختم کرنے کی حمایت appeared first on ایکسپریس اردو.

from ایکسپریس اردو https://ift.tt/2BE0Psv
via IFTTT