پاکستان میں انٹرنیشنل کرکٹ کی پھر بہار آ گئی ایکسپریس اردو

لاہور: پاکستان میں انٹرنیشنل کرکٹ کی پھر بہارآ گئی تاہم آج راولپنڈی میں زمبابوے سے پہلے ون ڈے انٹرنیشنل کے ساتھ کورونا میں بین الاقوامی میچز کی میزبانی کرنے والے دوسرے ملک کا اعزاز بھی حاصل ہوجائے گا۔

پاکستان انٹرنیشنل کرکٹ کی بحالی میں ایک اور سنگ میل عبور کرنے جارہا ہے، زمبابوے سے ون ڈے سیریز کا جمعے کو پنڈی اسٹیڈیم میں آغاز ہوگا،یاد رہے کہ زمبابوین ٹیم کی 2015 میں آمد کے ساتھ ملک میں بین الاقوامی کرکٹ کا سلسلہ بحال ہوا تھا، اس کے بعد ویسٹ انڈیز، سری لنکا اور بنگلہ دیش نے بھی میدانوں کی رونقیں بڑھائیں،کورونا وائرس کی وجہ سے پیدا ہونے والی صورتحال میں انگلینڈ کے بعد پاکستان کسی انٹرنیشنل سیریز کی میزبانی کرنے والا دوسرا ملک بھی بن گیا ہے۔

ورلڈ کپ 2023 کوالیفائرز کا درجہ رکھنے والی آئی سی سی سپر لیگ میں شامل سیریز میں پاکستان اور زمبابوے کی ٹیمیں اپنی اولین مہم میں فتح کے ساتھ پوائنٹس کا کھاتہ کھولنے کی منتظر ہوں گی، میزبان کو ہوم گراؤنڈز پر کمزور حریف کو زیر کرنے کا آسان موقع مل رہا ہے، ماضی کا ریکارڈ اس کی گواہی دینے لگا۔

گذشتہ باہمی سیریز میں پاکستان نے میزبان زمبابوے کو 5-0سے کلین سوئپ کیا تھا، یوں تو ریکارڈز اور ٹیموں کی قوت کو دیکھا جائے تو ہر چیز گرین شرٹس کو ہاٹ فیورٹ قرار دینے کیلیے کافی ہے مگر پاکستان کمزور حریفوں اور ناکام کھلاڑیوں کا اعتماد بحال کروانے کی شہرت بھی رکھتا ہے، اس لیے کسی انہونی کا انجانا خوف اعصاب پر سوار ہوگا، توقعات کا تمام تر بوجھ میزبان ٹیم پر ہے۔

مہمانوں کے پاس گنوانے کو کچھ نہیں، پہلے میچ کیلیے پاکستان نے 15کرکٹرز کا اعلان کیا ہے، ان میں سے امام الحق، عابد علی، فخر زمان میں سے کسی ایک اوپنر کو ڈراپ کرنا پڑے گا، بابر اعظم ہمیشہ کی طرح امیدوں کا محور ہوں گے۔

حارث سہیل، محمد رضوان، افتخار احمد، خوشدل شاہ میں سے مڈل آرڈر کا انتخاب ہوگا، بطور آل راؤنڈر فہیم اشرف کی عمدہ فارم کا فائدہ اٹھایا جاسکتا ہے، عماد وسیم بیٹ اور بال دونوں سے مفید ثابت ہونے کے اہل ہیں، شاداب خان کی عدم موجودگی میں عثمان قادر کی شمولیت کا موقع بن گیا ہے، شاہین آفریدی، حارث رؤف، وہاب ریاض اور محمد موسٰی خان میں سے پیس بیٹری کا انتخاب ہوگا۔

ویڈیو کال پر میڈیا سے گفتگو کرتے ہوئے بابر اعظم نے کہا کہ میں بطور کپتان پہلی ون ڈے سیریز جیتنا چاہتاہوں، کسی انٹرنیشنل ٹیم کو ہلکا نہیں لیا جا سکتا، ہم زمبابوے کو آسان حریف نہیں سمجھ رہے، مہمان ٹیم 2018سے مختلف ہے، اسے4، 5 سینئر بیٹسمینوں کی خدمات حاصل ہیں، ہم نے ہر کھلاڑی پر قابو پانے کیلیے حکمت عملی تیار کرلی، کھلاڑیوں سے کہا ہے کہ جس طرح انگلینڈ اور آسٹریلیا کیخلاف کھیلتے ہیں اسی طرح 110فیصد صلاحیتوں کا مظاہرہ کرنے کی کوشش کریں، ہم آئی سی سی سپر لیگ میں شامل ہوم سیریز میں فتوحات کا اعتماد لیے آئندہ مشکل مقابلوں کیلیے میدان میں اترنا چاہتے ہیں۔

انھوں نے کہا کہ کھلاڑیوں کی حوصلہ افزائی کریں تو جواب میں وہ بھی بھرپور سپورٹ کرتے ہوئے مثبت نتائج کیلیے جان لگاتے ہیں،سینئرز اور جونیئرز کو شامل کرتے ہوئے متوازن کمبی نیشن میدان میں اتاریں گے۔

دوسری جانب اپ سیٹ کی امیدیں لیے میدان میں اترنے والی زمبابوین ٹیم سکندر رضا، برینڈن ٹیلر،سین ولیمز اور ٹینڈائی چتارا جیسے سینئرز پر انحصار کرے گی،

کپتان چھامو چھیبھابھا کا کہنا ہے کہ سینئرز اور جونیئرز کی مدد سے  ہم ایک متوازن اسکواڈ کے ساتھ میدان میں اترتے ہوئے میزبانوں کا ڈٹ کر مقابلہ کرنے کی کوشش کریں گے،ایک بار میچ میں حاوی ہونے کا موقع ملا تو ہاتھ سے نہیں جانے دیں گے۔

انھوں نے کہا کہ میں اپنی کارکردگی سے بھی قیادت کا حق ادا کرنے کی کوشش کروں گا،پچ پر گھاس موجود مگر بیٹنگ کے لیے سازگار لگ رہی ہے، پلیئرزبڑے اسکور کی توقع کررہے ہیں۔

The post پاکستان میں انٹرنیشنل کرکٹ کی پھر بہار آ گئی appeared first on ایکسپریس اردو.

from ایکسپریس اردو https://ift.tt/3oIStGC
via IFTTT

بابر اعظم قیادت کا حق ادا کرنے کیلیے پْرعزم ایکسپریس اردو

لاہور: بابر اعظم زمبابوے سے سیریز میں بھی قیادت کا حق ادا کرنے کیلیے پْرعزم ہیں۔

زمبابوے سے ون ڈے سیریز کے آغاز سے قبل ویڈیو پریس کانفرنس میں بابر اعظم نے کہا کہ کسی سطح کی کرکٹ بھی ہواس کا دباؤ ضرور ہوتا ہے، ڈومیسٹک میچ بھی اس کے بغیر نہیں ہوتا،ابتدا میں نروس کرنے والے لمحات آتے ہیں،میں اپنی صلاحیتوں پر یقین رکھتے ہوئے اس پریشر سے نکلتا اور جانتا ہوں کہ ٹیم کی بیٹنگ میرے گرد گھومتی ہے، اس لیے دیگر بیٹسمینوں کو ساتھ چلانے کی کوشش کرتا ہوں۔

انہوں نے کہا کہ وہ ہوم سیریز میں بھی قیادت کا حق اداکرنے کیلیے پْرعزم ہیں،خوش قسمتی سے آئی سی سی سپر لیگ کی پہلی سیریز اپنے ہوم گراؤنڈ پر کھیلنے کا موقع مل رہا ہے،بطور کپتان میرے لیے بھی یہ بڑے اعزاز کی بات ہے، تماشائیوں کے سامنے کھیلنے کا لطف ہی کچھ اور ہوتا ہے مگر کورونا کی وجہ سے فی الحال خالی میدان میں ہی کھیلنا پڑے گا۔

ایک سوال پر بابر اعظم نے کہا کہ حیدر علی جارحانہ بیٹنگ کرتے جبکہ عبداللہ شفیق تھوڑا وقت لینے کے بعد نیچرل اسٹروکس کھیلتے ہیں،دونوں کا مزاج مختلف مگر باصلاحیت ہیں اور ان کا مستقبل روشن نظر آرہا ہے،میری کوشش ہوگی کہ ان کو سپورٹ کروں، ابھی تک خود جو سیکھا ان میں منتقل کروں گا تاکہ کھیل میں مزید نکھار آئے، ہوم سیریز میں جہاں موقع ہوا نوجوانوں کو آزمائیں گے۔

پریس کانفرنس میں بابر اعظم ٹیسٹ کپتانی کا سوال گول کرگئے

بابر اعظم ٹیسٹ کپتانی کا سوال گول کرگئے، زمبابوے کیخلاف ون ڈے سیریز سے قبل ویڈیو پریس کانفرنس میں طویل فارمیٹ میں بھی قیادت سنبھالنے کے سوال پر انھوں نے کہا کہ ابھی اس بارے میں سوچنے کی ضرورت نہیں،فی الحال تو زمبابوے کیخلاف ون ڈے سیریز پر توجہ مرکوز ہے، اس کے بعد ٹی ٹوئنٹی کے بارے میں غور کریں گے۔

ایک روزہ کرکٹ میں پہلی بار قیادت کے سوال پر انھوں نے کہا کہ مجھے مختصر فارمیٹ کا تجربہ حاصل ہے، اسی کی مدد سے اس سیریز میں بھی ٹیم کی کمان سنبھالوں گا۔

 

The post بابر اعظم قیادت کا حق ادا کرنے کیلیے پْرعزم appeared first on ایکسپریس اردو.

from ایکسپریس اردو https://ift.tt/35KoCEN
via IFTTT

پاکستانیوں کی مہمان نوازی نے زمبابوین کرکٹرز کا دل جیت لیا ایکسپریس اردو

لاہور: پاکستانیوں کی مہمان نوازی نے زمبابوین کرکٹرز کا دل جیت لیا۔

زمبابوین کپتان چھامو چھیبھابھا نے کہا کہ کورونا کی وجہ سے دنیا پر مشکل وقت ہے،اس صورتحال میں کرکٹ کا بحال ہونا بڑا خوش آئند ہے،پاکستان میں بہترین انتظامات کیے گئے ہیں،سیکیورٹی بھی بہترین ہے، ہمیں کوئی شکایات نہیں۔

دوسری جانب برینڈن ٹیلر نے سوشل میڈیا پر اسلام آباد کے ہوٹل کے باہر کا ایک دلکش اور حسین نظارہ شیئر کرتے ہوئے بتایا کہ وہ 12 سال بعد پاکستان آکر بہت خوش ہیں، انھوں نے لکھا کہ میں اس وقت اسلام آباد کے ایک شاندار ہوٹل میں موجود ہوں، پی سی بی کی مہمان نوازی، سیکیورٹی اور پھرجوش خیر مقدم بہترین ہے،میں سیریز کھیلنے کا منتظر ہوں۔

 

The post پاکستانیوں کی مہمان نوازی نے زمبابوین کرکٹرز کا دل جیت لیا appeared first on ایکسپریس اردو.

from ایکسپریس اردو https://ift.tt/3kGnjgl
via IFTTT

سہانے خواب دکھاکر فرنچائزز سے فیس طلب ایکسپریس اردو

کراچی: پی سی بی نے سہانے خواب دکھاتے ہوئے فرنچائزز سے اگلے ایڈیشن کی فیس طلب کر لی جب کہ اس حوالے سے انھیں 10 نومبر تک کا وقت دیا گیا ہے۔

پی سی بی اور پی ایس ایل فرنچائزز کا اجلاس گذشتہ روز منعقد ہوا،اس میں حکام کی جانب سے ٹیم اونرز کو مجوزہ مالی ماڈل پر پریزنٹیشن دی گئی، انھیں سلائیڈزکی مدد سے بتایا گیا کہ بورڈ کیا کرنا چاہتا ہے، کمرشل کنٹریکٹس کا 90 فیصد شیئر دینے کی پھریقین دہانی کرائی گئی،البتہ فرنچائزز اس وقت حیران رہ گئیں جب گذشتہ برس طے ہونے والے138 روپے کے ڈالر ریٹ کی جگہ155روپے کا کہا گیا، مالکان نے 104 روپے فکسڈ کرنے کا کہا۔

اگلے ایڈیشن کی فیس ایک بار پھر طلب کرتے ہوئے 10 نومبر کا وقت دیا گیا ہے، فرنچائزز کورونا کی وجہ سے مالی مسائل کا شکار ہیں اس لیے انھوں نے تاخیر کی درخواست کی تھی مگر حکام نے توجہ نہ دی۔

ذرائع نے بتایا کہ میٹنگ کے دوران بیشتر وقت بورڈ حکام کسی ٹھوس اقدام کی یقین دہانی سے  گریز کرتے ہوئے اپنی مجبوریاں بتاتے رہے، گذشتہ دنوں پبلک اکاؤنٹس کمیٹی میں اپنے ساتھ ہونے والے ’’سلوک‘‘ سے بھی آگاہ کیا گیا، ٹیم مالکان کو بتایا گیا کہ معاہدے میں کوئی تبدیلی کی تو مستقبل میں نیب اور ایف آئی اے کی تحقیقات میں آفیشلز کو جیل بھی جانا پڑ سکتا ہے، اس لیے جو وہ آسانی سے کر سکتے ہیں وہی کرینگ۔

اس موقع پر ایک ٹیم اونر نے کہا کہ پی ایس ایل میں فرنچائزز کا پیسہ لگا ہے عوام کا نہیں لہذا پبلک اکاؤنٹس کمیٹی کا اس میں کوئی کام نہیں ہے، ایک اور اونر نے کہا کہ اگلی میٹنگ میں آپ ہمیں بھی ساتھ لے جائے گا ہم انھیں جواب دینگے۔

چیئرمین پی سی بی احسان مانی کے بارے میں کہا گیا کہ وہ فرنچائزز کے مسائل حل کرنے میں دلچسپی رکھتے ہیں لیکن شاید بعض دیگر آفیشلز اتنے سنجیدہ نہیں ہیں، ایک موقع پر بورڈ حکام نے ٹیم مالکان پر جتایا کہ ہم سے لوگ کہتے ہیں کہ ان فرنچائزز سے معاہدہ ختم کیوں نہیں کر دیتے دوسرے لوگ سامنے آجائیں گے مگر ہم ایسا نہیں چاہتے۔

دوسری جانب ذرائع کا کہنا ہے کہ فرنچائزز مجوزہ ماڈل سے خوش نہیں اور اسے ’’اونٹ کے منہ میں زیرہ‘‘ قرار دے رہی ہیں، بورڈ بھی فیس میں تاخیر پر سخت اقدام کا ذہن بنا چکا مگر ’’مثبت میٹنگز‘‘ کی باتیں کر کے  معاملات حل کرنے میں اپنی سنجیدگی ظاہر کرنا چاہتا ہے۔

 

The post سہانے خواب دکھاکر فرنچائزز سے فیس طلب appeared first on ایکسپریس اردو.

from ایکسپریس اردو https://ift.tt/2HFZ9EK
via IFTTT

زمبابوین ٹیم ماضی میں پاکستان کاآسان شکار ثابت ایکسپریس اردو

لاہور: زمبابوین ٹیم ماضی میں پاکستان کا آسان شکار ثابت ہوتی رہی ہے، انہوں نے 59ون ڈے میچز میں صرف 4میں فتح پائی جب کہ 52میں شکست کا سامنا کرنا پڑا۔

ماضی میں پاکستان کیخلاف زمبابوین ٹیم کی کارکردگی مایوس کن رہی،دونوں کے مابین ابھی تک59ون ڈے میچزکھیلے جا چکے،ان میں سے گرین شرٹس نے 52میں کامیابی حاصل کی، زمبابوے نے 4میں فتح پائی، ایک میچ ٹائی ہوا، 2 بے نتیجہ رہے۔

پاکستان کا زمبابوے کیخلاف سب سے بڑا ٹوٹل399 اور کم سے کم 148رہا،2018میں ہونے والی گذشتہ باہمی سیریز میں پاکستان نے میزبان زمبابوے کو چاروں شانے چت کرتے ہوئے 5-0  سے کلین سوئپ مکمل کیا تھا، چوتھے میچ میں فخرزمان نے 210کی ناقابل شکست اننگز کھیلتے ہوئے ون ڈے ڈبل سنچری بنانے والے پہلے پاکستانی ہونے کا اعزاز حاصل کیا تھا۔

اوپنر نے اس سیریز میں 257کی اوسط سے 515رنز بنائے،اس میں ایک ڈبل سمیت 2 سنچریاں شامل تھیں،امام الحق کا بیٹ بھی خوب چلا،انھوں نے 79کی ایوریج سے 395رنز جوڑے اور3تھری فیگر اننگز کھیلیں،بابر اعظم نے ایک سنچری سمیت 184رنز بنائے تھے،بولرز میں فہیم اشرف،عثمان شنواری اور شاداب خان نے 9،9 شکار کیے تھے، بہترین بولنگ فہیم اشرف نے کی، انھوں نے صرف 22رنز دے کر 5وکٹیں اڑا دیں تھیں۔

اس سے قبل زمبابوین ٹیم مئی 2015میں پاکستان آئی تو ابتدائی دونوں میچ ہار گئی، تیسرا بے نتیجہ رہا تھا،اسی سال اکتوبر میں ہرارے میں کھیلے جانے والی سیریز میں گرین شرٹس نے پہلا میچ جیتا، دوسرے میں غیر متوقع شکست کا سامنا کیا، تیسرے میں کامیابی کے ساتھ سیریز اپنے نام کرلی۔

 

The post زمبابوین ٹیم ماضی میں پاکستان کاآسان شکار ثابت appeared first on ایکسپریس اردو.

from ایکسپریس اردو https://ift.tt/35JPepD
via IFTTT

عمر اکمل کیس، بورڈ بھاری اخراجات سے بچ گیا ایکسپریس اردو

لاہور: عمراکمل کیس کو طول دینے والا پی سی بی بھاری اخراجات سے بچ گیا، کھیلوں کی عالمی ثالثی عدالت نے ویڈیو لنک پر سماعت کی درخواست منظور کرلی، مزید پیش رفت دسمبر میں ہونے کا امکان ہے۔

رواں سال پی ایس ایل سے قبل بکیز کی جانب سے رابطے کی اطلاع بورڈ کو نہ کرنے کی پاداش میں عمر اکمل پر 3سال کی پابندی عائد کردی گئی تھی، بعد ازاں جسٹس ریٹائرڈ فقیر محمد کھوکھر نے اینٹی کرپشن ٹریبیونل کی طرف سے اعلان کردہ سزا کو 3 کے بجائے ڈیڑھ سال کردیا، پی سی بی نے پابندی کی مدت میں کمی کو اسپورٹس عالمی ثالثی عدالت میں چیلنج کیا۔

دوسری جانب عمر اکمل نے اسے مزید کم کے لیے اسی پلیٹ فارم پر رجوع کررکھا ہے، پی سی بی نے کورونا کی وجہ سے پیدا ہونے والی صورتحال میں ویڈیو لنک پر سماعت کی درخواست کردی تھی جو منظور کرلی گئی، عمر اکمل کے وکلا نے فریقین کو آمنے سامنے بٹھا کر سماعت کرنے کیلیے استدعا کی تھی جو مسترد کردی گئی۔

ذرائع کے مطابق عالمی ثالثی عدالت نے واضح کیاکہ سماعت ورچوئل ہوگی، عمر اکمل اب ویڈیو لنک پر سماعت کے لیے 2 نومبر تک دستیابی ظاہر کرسکیں گے، اس کیس کی سماعت دسمبر میں ہونے کا امکان ہے۔

یاد رہے کہ پاکستان کرکٹ میں پہلی بار ایسا ہوا ہے کہ پی سی بی نے کسی کرکٹر کی سزا میں کمی کو چیلنج کرتے ہوئے معاملے کو طول دیا، عام طور سزا کی مدت پوری ہونے پر کھلاڑیوں کے لیے واپسی کے دروازے کھلتے رہے ہیں۔

 

The post عمر اکمل کیس، بورڈ بھاری اخراجات سے بچ گیا appeared first on ایکسپریس اردو.

from ایکسپریس اردو https://ift.tt/386YoiT
via IFTTT

فرنچائزز کے ساتھ معاملات پر مثبت انداز میں پیش رفت جاری ہے، بورڈ ایکسپریس اردو

لاہور: پی سی بی نے کہا ہے کہ پی ایس ایل فرنچائزز کے ساتھ  معاملات پر مثبت انداز میں پیش رفت جاری ہے۔

پریس ریلیز میں کہا گیا کہ گذشتہ روز کے اجلاس میں بھی دونوں فریقین نے کھلے، ایماندارانہ اور دوستانہ  ماحول میں تبادلہ خیال کیا،نئے مالیاتی ماڈلز کے حوالے سے فرنچائزز کے مالکان کو پریزنٹیشن دی گئی ہے، اب وہ اپنے متعلقہ نمائندگان سے مشاورت کے بعد ان آپشنز کے حوالے  سے جواب دیں گی، تمام فریقین نے اس معاملے کا حل جلد نکالنے پر اتفاق کیا ہے،آئندہ میچز سے متعلق منصوبہ بندی پربھی کام تیزی سے جاری ہے۔

 

The post فرنچائزز کے ساتھ معاملات پر مثبت انداز میں پیش رفت جاری ہے، بورڈ appeared first on ایکسپریس اردو.

from ایکسپریس اردو https://ift.tt/2HCRhUv
via IFTTT