فضل الرحمن سے بات چیت کا الیکشن سے پہلے اچھا نتیجہ نکلے گا، اعتزاز احسن ایکسپریس اردو

 اسلام آباد: پیپلز پارٹی کے نامزد صدارتی امیدوار اعتزاز احسن نے امید ظاہر کی ہے کہ الیکشن سے قبل مولانا فضل الرحمن سے بات چیت کا اچھا نتیجہ نکلے گا۔

اسلام آباد میں پیپلزپارٹی کے مرکزی رہنماؤں نے پارلیمنٹ لاجز میں بلوچستان نيشنل پارٹی کے سربراہ اختر مینگل سے ملاقات کی اور صدارتی امیدوار اعتزاز احسن کو ووٹ دینے کی درخواست کی۔ وفد میں اعتزاز احسن، پی پی پی سیکرٹری جنرل نیئر بخاری، سینٹیر شیری رحمن، ترجمان چوہدری منظور شامل تھے۔

ملاقات کے بعد میڈیا سے گفتگو کرتے ہوئے سردار اختر مینگل نے کہا کہ پی پی پی کے علاوہ دیگر جماعتوں کے لوگ بھی ہمارے پاس آئے ہیں، ہم ایسا فیصلہ کرنے کی کوشش کریں گے جس سے وفاق مضبوط ہو۔

اعتزاز احسن نے کہا کہ سردار صاحب نے سی پیک اور لاپتہ افراد سمیت مختلف مسائل پر بات کی، زیادہ تر بات بلوچستان کے مسائل پر گفتگو کی گئی، مولانا فضل الرحمن کے ساتھ معاملات ابھی چل رہے ہیں، وہ ایک معتبر سیاست دان ہیں اور ان کا ایک مقام ہے، ہم کسی صورت ان پر حرف نہیں لانا چاہتے۔

اعتزاز احسن نے مزید کہا کہ ہماری کوشش ہے مولانا صاحب ہمارے حق میں دستبردار ہو جائیں، جبکہ مولانا کی کوشش ہے ہم دستبردار ہو جائیں، اس پر انتخابات سے پہلے کوئی اچھا نتیجہ نکلے گا، اعتزاز احسن کی قیادت میں پیپلز پارٹی کا وفد آج کراچی جائے گا جہاں وہ مختلف جماعتوں سے صدارتی ووٹ کیلئے ملاقاتیں کریں گے۔

The post فضل الرحمن سے بات چیت کا الیکشن سے پہلے اچھا نتیجہ نکلے گا، اعتزاز احسن appeared first on ایکسپریس اردو.

from ایکسپریس اردو https://ift.tt/2Pqo1yd
via IFTTT