کراچی میں پولیس کی کارروائیوں میں 9 ڈکیت گرفتار ایکسپریس اردو

  کراچی: شہر قائد کے مختلف علاقوں میں پولیس نے کارروائیاں کرتے ہوئے اسٹریٹ کرائم میں ملوث 9 ملزمان کو گرفتار کرلیا۔

تفصیلات کے مطابق شہر قائد کے علاقے خواجہ اجمیر نگری میں پولیس نے کارروائی کرتے ہوئے اسٹریٹ کرائم میں ملوث پانچ ملزمان کو گرفتار کرلیا۔ ضلع وسطی کی پولیس کے ترجمان کے مطابق کارروائی اجمیر نگری تھانے کی پولیس نے خفیہ اطلاع موصول ہونے پر کی، گرفتار ملزمان کی شناخت دانیال، شرجیل، رافع، شکیل اور عرفان کے ناموں سے ہوئی۔

پولیس کے مطابق ملزمان کے قبضے سے تین ٹی ٹی پستول، لوڈ میگزین اور دو مسروقہ موٹر سائیکلیں برآمد ہوئیں جو شریف آباد اور سرجانی سے چوری کی گئیں تھیں اور انکے مقدمات متعلقہ تھانوں میں درج ہیں۔ پولیس نے گرفتار ملزمان سے اسٹریٹ کرائمز کی وارداتوں کے حوالے سے مزید تحقیقات شروع کردی۔

سائٹ سپرہائی وے صنعتی ایریا میں ڈاکو مقابلے کے بعد زخمی حالت میں گرفتار

سائٹ سپرہائی وے صنعتی ایریا پولیس نے ناردرن بائی پاس حبیب ریسٹورنٹ کے قریب مبینہ مقابلے میں زخمی سمیت 2 ڈاکوؤں کو گرفتار کرلیا۔

پولیس کے مطابق زخمی ڈکیت عتیق اللہ کو فوری طبی امداد کے لیے عباسی شہید اسپتال لیجایا گیا جبکہ اس کے ساتھی عباد اللہ سے پولیس مزید تحقیقات کر رہی ہے ، ڈاکوؤں کے قبضے سے نائن ایم ایم پستول ، لوڈ میگزین ، 2 موبائل فونز ، نقدی اور چھینی ہوئی موٹر سائیکل برآمد ہوئی ہے۔

جمالی پُل سے دو ڈکیت رنگے ہاتھوں گرفتار

علاوہ ازیں پاکستان رینجرز (سندھ) اور پو لیس نے مشترکہ کارروائی کرتے ہوئے کراچی کے علاقے جمالی پُل مویشی منڈی کے قریب سے ڈکیتی میں ملوث2 ملزمان محمد اشرف اور غلام محمد کو گرفتار کر لیا۔ ملزمان کے قبضے سے ڈکیتی میں استعمال ہونے والا30 بور پستول اور چھینی ہوئی نقد رقم 16 ہزار روپے برآمد ہوئی۔

جمالی پُل مویشی منڈی کے قریب دو مسلح ڈاکو گاڑی میں سوارشہریوں سے رقم چھیننے پہنچے تو شہریوں نے مزاحمت کی، جس پر علاقے میں گشت پر تعینات رینجرز موبائل نے شہریوں کی نشاندہی پر دونوں ملزمان کو موقع پر گرفتار کر کے ملزمان کے قبضے سے اسلحہ اور لوٹی ہوئی رقم بھی برآمد کرلی جو کہ موقع پر ہی مالکان کو واپس کر دی گئی۔

دو صحافی لٹ گئے

اُدھر پیر کی شب بلوچ کالونی ایکسپریس وے پر آزادانہ لوٹ مار کرنے والے موٹر سائیکل سوار ڈاکوؤں نے اقرا یونیورسٹی کے سامنے ایکسپریس ٹریبیون کے دو کارکنان کو اسلحے کے زور پر یرغمال بنا کر نقدی، دو موبائل فونز، بیگ اور پرس چھین لیا۔ متاثرین نے بتایا کہ دو موٹر سائیکلوں پر چار ڈاکو سوار تھے جنہوں نے واردات کی۔

ڈاکوؤں کے ہاتھوں اسٹریٹ کرائمز کی واردات کا نشانہ بننے والوں نے بلوچ کالونی تھانے میں واقعہ کی رپورٹ درج کرا دی جبکہ چھینے جانے والے 2 پرس میں اے ٹی ایم کارڈز ، شناختی کارڈز اور دیگر دستاویزات موجود تھیں۔

شہر قائد میں اسٹریٹ کرائمز کی بڑھتی ہوئی وارداتوں کے حوالے سے شہریوں کا کہنا ہے کہ جب پولیس کے اعلیٰ افسران ہی نوٹس لینے میں عدم دلچسپی کا مظاہرہ کریں تو شہر میں اسٹریٹ کرائمز پر کیسے قابو پایا جا سکتا ہے ، شہریوں کو اسٹریٹ کرمنلز کے رحم و کرم پر چھوڑ دیا گیا ہے ، شہری ڈاکوؤں کے ہاتھوں مصروف شاہراہوں ، سڑکوں ، گلیوں اور محلوں میں لٹ رہے ہیں بلکہ معمولی مزاحمت پر زخمی اور اپنی جان بھی گنوا رہے ہیں اور ان وارداتوں کا کوئی نوٹس لینے والا ہی نہیں ، افسران محافظوں کی فوج میں اپنی مراعات سے لطف اندوز ہو رہے ہیں۔

The post کراچی میں پولیس کی کارروائیوں میں 9 ڈکیت گرفتار appeared first on ایکسپریس اردو.

from ایکسپریس اردو https://ift.tt/fNrClje
via IFTTT