کراچی میں بغیر ہیلمٹ پر 14 ہزار چالان، 8500 موٹر سائیکل ضبط ایکسپریس اردو

کراچی:  ٹریفک پولیس نے بغیر ہیلمٹ موٹر سائیکل چلانے والوں کے خلاف پیر سے شروع ہونے والی خصوصی مہم کے پہلے روز مجموعی طور پر 14 ہزار چالان کرکے 21 لاکھ روپے جرمانہ عائد کرکے 15 لاکھ 95 ہزار 700 روپے وصول کرلیے جب کہ مہم کے دوران بغیر ہیلمٹ موٹر سائیکل چلانے والے 8500 شہریوں کی موٹر سائیکلیں ضبط کرلی گئیں۔

ٹریفک پولیس کراچی نے بغیر ہیلمٹ موٹر سائیکل چلانے والوں کے خلاف پیر کو شروع کی جانے والی خصوصی مہم میں مجموعی طور پر 14 ہزار ایک چالان کر کے21 لاکھ 150 روپے جرمانہ وصول کرلیا ، خصوصی مہم کے دوران ٹریفک پولیس نے 8 ہزار 674 موٹر سائیکلوں کو بھی ضبط کیا گیا۔

ترجمان ٹریفک پولیس کی جانب سے جاری اعداد و شمار کے مطابق ٹریفک پولیس نے بغیر ہیلمٹ موٹرسائیکل چلانے والوں کے خلاف شروع کی جانے والی خصوصی مہم کے پہلے روز ٹریفک پولیس ساؤتھ نے 3 ہزار 472 چالان کر کے 5 لاکھ 20 ہزار 800 روپے جرمانہ عائد کرتے ہوئے 2 ہزار 466 موٹر سائیکلوں کو ضبط کرلیا۔

اسی طرح سے ٹریفک پولیس سینٹرل نے 2 ہزار 540 چالان ، 3 لاکھ 81 ہزار جرمانہ عائد کر کے 1313 موٹر سائیکلوں کو ضبط کرلیا ، ٹریفک پولیس ایسٹ نے 2 ہزار 349 چالان ، 3 لاکھ 52 ہزار 350 روپے جرمانہ عائد کر کے 1451 موٹر سائیکلوں کو ضبط کرلیا ، ٹریفک پولیس سٹی نے ایک ہزار 746 چالان ، 2 لاکھ 61 ہزار 900 روپے جرمانہ اور 1272 موٹر سائیکلوں کو ضبط کرلیا۔

ٹریفک پولیس ویسٹ نے ایک ہزار 933 چالان ، 2 لاکھ 89 ہزار 950 روپے جرمانہ اور 858 موٹر سائیکلوں کو ضبط کرلیا ، ٹریفک پولیس کورنگی نے 963 چالان ، ایک لاکھ 44 ہزار 450 روپے جرمانہ ، 705 موٹر سائیکلیں جبکہ ٹریفک پولیس ملیر نے 998 چالان ، ایک لاکھ 49 ہزار 700 روپے چالان اور 609 موٹر سائیکلوں کو ضبط کرلیا۔

قبل ازیں پیر کی صبح کراچی ٹریفک پولیس نے شارع فیصل میٹروپول چورنگی پر بغیر ہیلمٹ موٹر سائیکل چلانے والوں کے خلاف خصوصی مہم شروع کی۔

ڈی آئی جی ٹریفک جاوید علی  مہر نے بتایا کہ رمضان المبارک سے شہریوں کو آگاہ کیا جا رہا تھا اور اس سلسلے میں مختلف شاہراہوں پر آگاہی بینرز اور پینا فلکس بھی لگائے گئے تھے شہریوں کو بتادیا تھا کہ ٹریفک پولیس یکم جولائی سے بغیر ہیلمٹ بائیک چلانے والوں کے خلاف سخت مہم شروع کررہی ہے، ٹریفک پولیس نے مہم کے لیے خصوصی منصوبہ بندی کی ہے ٹریفک سیکشن افسران2 شفٹوں میں شارع فیصل پر ڈیوٹی دیں گے اور مشترکہ گشت کریں گے۔

انہوں نے بتایا کہ شارع فیصل پر بغیر ہیلمٹ کسی کو بھی موٹرسائیکل چلانے کی اجازت نہیں ہوگی کوئی بھی موٹرسائیکل سوار بغیر ہیلمٹ شارع فیصل پر آئے گا تو اس کا چالان کاٹ کر موٹرسائیکل ضبط کرلی جائے گی موٹرسائیکل شہری کو اسی صورت واپس کی جائے گی جب شہری ہیلمٹ خرید کر لائے گا، بغیر ہیلمٹ موٹرسائیکل چلانا انتہائی خطرناک ہے،مہم کا مقصد ٹریفک حادثات کی شرح کم کرنا ہے مہم بھرپور انداز میں چلائی جائے گی اور شہر بھر میں چالان کیے جائیں گے۔

The post کراچی میں بغیر ہیلمٹ پر 14 ہزار چالان، 8500 موٹر سائیکل ضبط appeared first on ایکسپریس اردو.

from ایکسپریس اردو https://ift.tt/2NrNzPC
via IFTTT